Commando – A One Man Army (2013) අයුක්තියට එරෙහි වූ සෙබළා

දන්නවද කමාන්ඩෝ කෙනෙක් කියන්නෙ කවුද කියල? සාමාන්‍ය මිනිහෙක් කමාන්ඩෝ කෙනෙක් වෙන හැටි දන්නවද? කිලෝ 65කුත් උස්සගෙන, අඩි 20,500ක් උඩ ඉඳන් කවද හරි ඔයා බිමට පැනල තියනවද? පැරා කමාන්ඩෝ කෙනෙක් තමන්ගෙ මූලික පුහුණුවේදි ඒ වගේ පස් වතාවක් පනිනව. ඉන් එක් වතාවක් සම්පූර්ණ අඳුරු රැයක පනින්නෙ. ඒවගේම තව වතාවක් හැම යුධ උපකරණයක්ම අරගෙන පනින්නෙ. කිලෝ 50ක බරක් උස්සගෙන කිලෝමීටර් 60ක් ඇවිදිනව. ඒ බරම උස්සගෙන කිලෝමීටර් 20ක් යනව කඳු පල්ලම් වල. වර්ග 22ක තුවක්කුත් එක්ක, ගැඹුරු මුහුදේ කිමිදෙනව. මේ තමයි කමාන්ඩෝ කෙනෙක්ගෙ දින චර්යාව. නිරායුධව ආයුධ සන්නද්ධ මිනිසුන් එක්ක සටන් කිරීම, සතුරු භූමියට ඇතුල් වෙලා සතුරාගේ භූමියේදීම සතුරා විනාශ කර දැමීම, කමාන්ඩෝ කෙනෙක්ගෙ එක් දින රාජකාරියක් විතරයි. ඉර එලියටවත් ලඟා වෙන්න අමාරු තැන් වලට කමෝන්ඩෝ කෙනෙක්ට ලඟා වෙන්න පුලුවන්. මිනිසුන්ගේ මරණයට හේතුවන විෂකුරු සර්පයන් කොමාන්ඩෝ භටයෙක්ගෙ ආහාර වේලක කොටසක් වෙනවා.. ඔයා වගේ අය සම්පූර්ණ ආරක්ෂක බලඇණියත් එක්කම වුනත් යන්න බය වෙන තැන් කමාන්ඩෝස්ලා තමයි අපේ රටට නැවතත් හිමි කරල දෙන්නෙ. කමාන්ඩෝ කෙනෙක් මිනිස්සු දාහකට නෙමෙයි, දහ දාහකට සමානයි…. මොකද අයදුම්කරුවන් දහදාහකින් එක්කෙනෙක් විතරයි කමාන්ඩෝ කෙනෙක් වෙන්නෙ. මේ වගේ දුෂ්කර කාර්යන් විතරක් නෙමෙයි, බදු ගෙවන මිනිසුන්ගේ සල්ලි වලින්, හමුදා පුහුණු කරුවන්ගේ ලේ දහඩිය වලින්… ඒවගේම රට වෙනුවෙන් මැරෙන්න වුනත් තියන කැමැත්ත පෙරදැරිව තමයි කමාන්ඩෝ කෙනෙක් හැදෙන්නෙ.

“මොහොතක්වත් නොහිතා තමන්ගෙ රට වෙනුවෙන් ජීවිතේ වුනත් දෙන්න පුලුවන් කරන් වගේ කෙනෙක්ව… චීන හමුදාවට බාර දෙන්න පුලුවන්ද?”

මෙන්න මේ ආකාරයට තමයි ‘කර්නල් සිංහා’ විසින්, රට වැනසීමට බලයට පත් දේශපාලුවෙක්ට කමාන්ඩෝ භටයෙක්ගේ වටිනාකම පැහැදිළි කරල දෙන්නෙ. දෛනික හමුදා පුහුණුවකදී කමාන්ඩෝ සෙබල ‘කරන්වීර් ඩෝග්රා’ ගමන්ගත් හෙලිකොප්ටර් යානය සතුරු භූමියක් වන චීනයේ ඟඟකට කඩා වැටිලා. නමුත් අධික වර්ෂාව නිසා සැඩ පහර නිසා යානයේ සුන්බුන් අතුරුදන් වෙලා. චීනය කරන්ව ඔත්තුකරුවෙක් ලෙස සැක කර දඬුවම් කිරීමටයි සූදානම. මේ අතර ඉන්දියානු රජය ඔහු තම රටේ සෙබලෙක් නොවන බව චීනයට ප්‍රකාශ කරනවා..

මේ සියල්ල හමුවේ කමාන්ඩෝ සෙබලෙක් අපේක්ෂා භංගත්වයට පත් වී අඩපණ වෙයිද?දුෂ්ට, ආත්මාර්ථකාමී දේශපාලුවන්ට සහ මැරයන්ට අභියෝගයක් වූ කරන්ගේ ඉදිරි ගමන මොන ආකාරයට විසඳෙයිද? ඔහුගේ ගමනාන්තය කුමක් වෙයිද? අවසානයේ දුෂ්ටයින්ට කුමක් සිදුවෙයිද? චිත්‍රපටය අවසානයේ හැමෝටම බලාගන්න පුලුවන්.

මෙම ත්‍රාස්‍යජනක, ක්‍රියාදාම චිත්‍රපටය නිමවී ඇත්තේ Singham සහ Force යන සුපිරි චිත්‍රපට නිර්මාණකරුවන්ගේ දෑතිනි. විශේෂයෙන් කිව යුතුයි, “මෙහි ප්‍රධාන චරිතයට පණ පොවන Vidyut Jamwal විසින් සිදුකරන ක්‍රියාදාමයන් අතරින්, පාලම මත සිට ඟඟට පැනීම හැර අනෙකුත් සියලුම ක්‍රියාදාම අවස්ථාවන් කේබල් භාවිතයෙන් හෝ පරිගණක ඇසුරෙන් හෝ කරන ලද ඒවා නොව, ඔහු විසින් සැබවින්ම සිදුකරන ලද ඒවා වේ.” එම නිසා මෙම චිත්‍රපටය තාත්වික සටන් වලින් සපිරි කුතුහලය දනවන අපූරු සිනමා අත්දැකීමක් වන බව නොඅනුමානයි.