Jailer (2023) ජේලර්

මුත්තු සාමාන්‍ය ජීවිතයක් ගත කරන විශ්‍රාම ගිය ජේලර් වරයෙක්. මුත්තු එයාගේ පවුල එක්ක සතුටින් ජීවිතය ගත කරමින් ඉද්දි එයාගේ පුතා වුණ සහකාර කොමසාරිස් අර්ජුන් පිළිම ජාවාරම් කල්ලියකට අහුවෙනවා. ඉන් එහාට නිවැරදි තොරතුරක් ලැබුණෙ නැති නිසා මුත්තු තනිවම අර්ජුන්ට සිද්ද වුණ දේ හොයන්න ගන්නවා. ඒ අනුව අර්ජුන් මරා දමා ඇති බවට මුත්තුට දැනගන්න ලැබෙනවා. ඒ බව දැනගත් මහළු මුත්තු වැලපෙමින් නිවෙසට වෙලා හිටියේ නැහැ. තමන්ගේ පුතාව මරා දැමූ ඝාතකයාව සොයා ගොසින් මරා දමනවා. මේ මරණයෙන් මුත්තුගේ හිත නිදහස් වේවි කියලා බලාපොරොත්තු වුණත්, තත්වය බරපතළ වෙන්න ගත්තේ එතකොටයි. දිනක් පිළිම ජාවාරම් කරුවන් මුත්තුගේ මුනුබුරා රිත්වික් මරන්නට තැත් කරනවා. මුත්තු රිත්වික්ව බේරාගත්තත්, එම කල්ලියේ ප්‍රධානියා වර්මන් මුත්තුගේ මුළු පවුලම මරා දමන බවට තර්ජනය කරනවා. මුත්තු තමන්ගේ පවුලේ අයට කිසිවක් නොකරන ලෙස ඉල්ලමින් වර්මන්ගෙන් සමාව අයදිනවා. වර්මන් ඒ කිසි දෙයකට අනුකම්පාවක් දැක්වූවේ නැහැ. ඒ අනුව මුත්තු, මේ වර්මන්ගේ කල්ලියෙන් ගැලවෙන්න සැලැසුමක් ක්‍රියාත්මක කරනවා. මුත්තු මිතුරෙකුගේ උපකාර ඇතිව වර්මන් ජාවාරම් කරන පිළිමයක් අත්පත් කරගන්නවා. මේ පිළිමය මාර්ගයෙන් වර්මන් බ්ලැක්මේල් කර මුත්තුගේ පවුල ආරක්ෂා කර ගන්නවා. පිළිම ජාවාරම ඉදිරියට සිද්ද වන ආකාරය ගැන තොරතුරු දැනගන්න මුත්තු, තමන්ගේ පවුලට කරදරයක් කරොත් ඒ පිළිම ලබා ගන්නා බවට අවවාද කරමින් වර්මන් සමඟ සම්මුතියකට එළඹෙනවා. වර්මන්ද ඒ කොන්දේසි වලට එකඟ වී තවදුරටත් ඔවුන් දෙදෙනාම අනෙකාගේ වැඩකටයුතු වලට හරස් වෙන්නේ නැති බවට එකඟ වෙමින් පිටව යනවා. ඒත් මුත්තු වර්මන්ව තඹ දොයිතුවකට විශ්වාස කරේ නැහැ. ඊට දින කිහිපයක් ගත වෙන්නටත් පෙරම වර්මන් මුත්තුගේ පවුල කපා කොටා මරා දමන්න දරුණු මැර කල්ලියක් මුත්තුගේ නිවෙසට පිටත් කර හරිනවා.

මේ චිත්‍රපටය අධ්‍යක්ෂණය කරනු ලැබුවේ Kolamavu Kokila, Doctor, Beast නෙල්සන් දිලිප් කුමාර් විසින්. කෝලමාවු කෝකිලා, ඩොක්ටර් වගේ අද්විතීය Dark Humor චිත්‍රපට දෙකක් දුන්න මේ අධ්‍යක්ෂකවරයාව බීස්ට් චිත්‍රපටයෙන් කකුලේ පෑගෙන දුහුවිල්ලක් තරම් අගෞරවට පත් කරන්නට ගත්තා. විශේෂයෙන්ම Beast චිත්‍රපටයේ නිමාව අදායම් වශයෙන් වගේම ප්‍රතිචාර වශයෙන්ද විශාල ලෙසින් බලපෑමට ලක් වුණා. විශේෂයෙන්ම බීස්ට් චිත්‍රපටයේ අවසන් ජවනිකාව ජ්‍යාත්‍යන්තර මට්ටමින් Troll කරන්නට ගත්තා. විජයි රසිකයින් නෙල්සන්ගේ පළු අරිමින් බැන වදින්නට ගත්තා. පෙර අත්දැකීම් නිසාම Thalaivar 169 ලෙසින් හැඳින්වුව මේ චිත්‍රපටයේ රූගත කිරීම් ඉතාමත් අවබෝධයෙන් සිදු කරන බව ආරංචි මාර්ග වලින් දැනගන්නට ලැබුණා. ජේලර් නිකුත් වන්නට මාසයකට පෙරදී කොලිවුඩ් කර්මාන්තයේම කතාබහ වුණේ Leo චිත්‍රපටිය ගැනයි. ලෝකේෂ් කනගරාජ්ගේ අධ්‍යක්ෂණය කරන Leo චිත්‍රපටය LCU(ලෝකේෂ් සිනමා විශ්වය) එකට අයත්ද යන්න ගැන බහුතරයක් මත ඉදිරිපත් කරමින් 2023 වසරේ මීට වඩා දැවැන්ත චිත්‍රපටයක් නැහැ කියන අදහසින් සිටියා. කොහොමහරි ජුලි 6වැනිදා Kaavaalaa නම් ගීතය යූටියුබ් වෙතට නිකුත් කෙරෙනවා. ඊට පස්සෙදි නම් බලන බලන තැන කාවාලා කාවලා.

කොහොම වුණත් චිත්‍රපටයේ Showcase වීඩියෝව, එහෙම නැත්නම් ට්‍රේලරය මිලියන 20ක් වගේ සැළකිය නොහැකි තරමේ යූටියුබ් නැරඹුම් වාර ප්‍රමාණයක් ලබා තිබුණා. චිත්‍රපටයේ ප්‍රවර්ධන කටයුතු ද විශාල වශයෙන් සිදු කෙරුණේ නැහැ. ඒත් අගෝස්තු 10 නිකුත් වුණ මේ චිත්‍රපටිය නිකුත් වූ දිනම අති දැවැන්ත ලෙසින් ඉ.රු. කෝටි 100 පසුකල ආදායමක් වාර්ථා කරනවා. එය එක් දිනක් තුල වැඩිම ආදායමක් හිමිකරගත් තෙවන කොලිවුඩ් චිත්‍රපටිය වනවා. ජේලර් තෙවෙනි වන්නේ රජිණිගේම 2.0, Kabali යන චිත්‍රපට දෙකටයි.

මෙහි රජිණිකාන්ත්, මෝහන් ලාල්, සිවරාජ් කුමාර්, රම්‍යා ක්‍රිෂ්ණන්, වසන්ත් රවී, යෝගි බාබු, සරවණන්, සුනිල් වර්මා, සුනිල් රෙඩ්ඩි, ජී. මාරිමුත්තු ආදී නළු නිළි රැසක්ම රඟපානවා. මෝහන් ලාල්, ශිවරාජ් කුමාර්, සුනිල් වර්මා, ක්‍රිෂෝර්, තමන්නා සුළු කොටසක් වෙනුවෙන් පෙනී ඉන්නවා. රොක්ස්ටාර් අනිරුද් මීට සංගීතය සපයනවා. තමන්නා පෙනී සිටින Kaavaalaa ගීතය යූටියුබ් වෙතට නිකුත්කර දින 12ක කාලයකදී ‍නැරඹුම් වාර මිලියන 50 පසු කළා. එය 2023 වසරේ කොලිවුඩයේ වේගවත්ම යූටියුබ් නැරඹුම් වාර මිලියන 50 පසුකළ Lyrical වීඩියෝ වාර්ථාවක්. ඒ වගේම මාසයක් යන්නටත් කලින් මිලියන නැරඹුම් වාර මිලියන 100 පසු කරනවා. මෙහි Hukum සහ Jujubee ගීත තලෛවර්ගේ දැවැන්ත රසිකයෙකු වන සුපර් සුබ්බු විසින් රචනා කරනු ලැබුවා. Hukum ගීතයත් එක්ක ඔහු වඩාත් ප්‍රසිද්ධියක් හිමිකර ගත්තා. ඒ වගේම හුකුම් ගීතයේ පද රචනාව සමාජමාධ්‍යයේ මතභේදයට ලක් වුණා.

මේ වෙද්දි ඉ.රු. කෝටි 480ක පමණ ආදායමක් උපයා තිබෙනවා. කේරළයේ වැඩිම ආදයාමක් ඉපයූ කොලිවුඩ් චිත්‍රපටය, තෙළිඟු ප්‍රාන්තවල වැඩිම ආදායම් ඉපයූ දෙවන කොලිවුඩ් චිත්‍රපටය, ආන්ද්‍රාවල වැඩිම ආදායම් ඉපයූ දෙවන කොලිවුඩ් චිත්‍රපටය ආදී විවිධ වාර්ථා රැසක්ම බිහි කර හමාරයි. ඉදිරි දිනවල මේවාද බිඳ දැමීමට(නිර්මාණය කිරීමට) සූදානම්.