NERU (2023) යුක්තිය සොයා

ගිය වසරේ අවසන් භාගයේ දිගින් දිගටම අති සාර්ථක ආදායම් වාර්ථා තැබූ චිත්‍රපට කීපයක්ම දැක ගන්න ලැබුනා.ඒ අනුව වෙනත් වසර වලට වඩා වැඩි චිත්‍රපට ප්‍රමාණයක් 2023 වසරේ අතිශය ජනප්‍රිය වුනා. මලයාලියො චිත්‍රපටි හදන්නෙ බොහෝ විට මලයාලියන්ටමයි. දමිල තෙළිඟු ජනගහනය එක්ක බලනකොට මලයාලි ජනගහණය ඉන් අඩක් පමණයි ඒ කියන්නෙ කෝටි තුනකට මදක් වැඩියි, ඒ අනුව බලන කොට කෝටි 100 ඉක්මවනව කියන්නෙ ඒක විශාල ජයග්‍රහනයක්.

දෙසැම්බර් 22 දා සිනමා හල් වලට නිකුත් උන මෙම චිත්‍රපටය මේ වන විට 2023 වසරේ කෝටි 100 ආදායම ඉක්මවූ සිව් වැනි චිත්‍ර පටය වීමට ඉතා ආසන්නයි. මලයාලි සිනමාවේ මහා නළු දෙපලගෙන් මම්මුට්ටි ගිය වසරෙ ජනප්‍රිය චිත්‍ර පට කිහිපයකින් එළියට ආවත් මෝහන්ලාල්ගේ එතරම් සාර්ථක වුන චිත්‍රපට දකින්න ලැබුනෙ නෑ.ඒත් අවසානයේ ඔහු ජීතු ජෝශප් සමග සං‍යෝජනය වී කරපු ලොකු වැඩකින් එළියට එනවා. ඒ තමයි නේරු, ජීතු ජෝශප් මෝහන් ලාල් සුසං‍යෝගය ගැන අමුතුවෙන් කියන්න ඕනෙ නෑනේ. Drishyam (2013) සහ Drishyam 2 (2021),12th Man (2022) මතක් කර ගන්න. ඒ චිත්‍රපට ජීතු ජෝශප්ගේ. මේ තමයි ඔහුගෙ අළුත්ම එක.

ඔබට යම් අසාධාරණයක් වූ විට ඔබ ඊට එරෙහිව නීතිය ඉදිරියට යනවාද? ඔව් ඔබ එහිදී නීතියෙන් සාධාරණය බලාපොරොත්තු වෙනවා, අපරාධකාරයාට දඬුවම් ලැබෙනවා. ඒ තමයි පිළිගත් සත්‍යය. එහෙත්.ඒක ඒ විදිහටම සිද්ධ වෙයිද? නීතිය ඉදිරියේ වින්දිත ඔබ මෙන්ම අපරාධකරුද එක සමානයි. නැත්තම් පනහට පනහ. තීන්දුව ලැබෙන තෙක් ඒක එහෙමයි. ඔබ කොතරම් නිවැරදි උනත් ඔබට ඔබගේ නීතිඥයාගේ දක්ෂතාව, පිළිගත් සාක්ෂි මත යැපෙන්නට සිදු වෙනවා මෙන්ම ඔබගේ විරුද්ධවාදියාගේ ප්‍රතිචාරයටද මුහුණ දෙන්න වෙනවා. ඔහුගේ ගැලවීම සඳහා නිපදවෙන උපක්‍රම සාක්ෂි සහිත ඔහුගේ කඳවුරේ ප්‍රභලතාව මත ඔබ පරාජය වනවා පමණක් නොව ඔබ අපරාධකරුවෙකු වෙන්නත් ඉඩ තිබෙනවා..