Gatta Kusthi (2022) මල්ලවපොර

කීර්ති කේරළ ප්‍රාන්තයේ ජීවත් වෙන්නෙ. එයා පොඩි කාලේ ඉඳන්ම ගට්ටා කුස්ති(ගැට මල්ලවපොර වගේ අදහසක්) ඉගෙන ගන්නවා. වෙහෙසිලා පුහුණුවීම් කරලා ජාතික, ජාත්‍යන්තර මට්ටමින් ඉන්දියාවට ජයක් අත් කර දෙන එක එයාගේ ඉලක්කය. ඒත් කීර්තිට මේ හීන ඉෂ්ඨ කරගන්න හිතද්දි බාධාවක් වෙනවා. එයාගේ තාත්තට හෘදයාබාධයක් ඇති වෙනවා. තාත්තා මැරෙන්න කලින් කීර්තිට කසාදයක් කරලම මැරෙන්න ආස කරා. ඒත් කීර්ති කුස්ති ක්‍රීඩිකාවක් කියලා දැනගත්තම කවුරුවත් මේ යෝජනාවට කැමති වුණේ නැහැ.
ඒ මදිවට කීර්තිගෙ නංගිට Eve teasing කරපු කොල්ලෝ කල්ලියකට කීර්ති පන්න පන්නා ගිහින් හොඳටම ගහනවා. කීර්ති කොල්ලන්ට පන්න පන්නා ගහන වීඩියෝව හතර වටේ හැමෝම ෆෝන් අරගෙන වීඩියෝ කරලා සමාජ මාධ්‍යවලට දැම්මා. මේ හින්දා කිර්තිට කේරළයෙන් කසාදයක් කරගන්න බැරි තැනට පත් වෙනවා. මුළු කේරළයම මේ සිද්දිය දන්න හින්දා අල්ලපු ප්‍රාන්තය වුණ තමිල්නාඩුවෙන් යෝජනාවක් බලන්නයි ලැහැස්ති වෙන්නෙ. තමිල්නාඩුවේ කීර්තිට අහුවෙන්න යන බිල්ල තමයි වීරා. වීරා පිරිමි ජාතිභේද වාදියෙක්. පිරිමි ආධිපත්‍යයෙන්, මාන්නයෙන් ඉන්න කෙනෙක්. ඉතින් 7 වසර සමත් වීරා හෙව්වේ යටත් පහත්, තැන්පත් කෙල්ලෙක්ව. මේ කසාදේ කෙරෙන්නම ඕනෙද ඇහුවොත්, කීර්තිගේ තාත්තා පපුව අල්ලගන්නවා. ඉතින් කීර්තිට අහුවුණ වීරාගේ ඉරණම ඉස්සරහට කොහොම වේවිද කියලා බලලම දැනගන්නකෝ!