Pindam (2023) නූපන් කලලය

1930 ගණන් වලදි නල්ගොන්ඩා නම් ප්‍රදේශයේ සිදු වුණ සත්‍ය සිදුවීමක් පාදක කරගෙන මේ කතාව රචනා කර තිබෙනවා. මේ කතාව ගලා යන්නේ භ්‍රෑණයක්(කලලයක්) සම්බන්ධව සිදුවන අත්භූත සිදුවීම් මාලාවක් වටායි.

ඇන්ටනිගේ පවුල අලුත් නිවාසයක පදිංචියට යනවා. මේ ගෙදරදි ඇන්‍ටනිට පුතෙක් ලැබේවි කියලා ඇන්ටනිගේ අම්මා විශ්වාස කළා. ඒත් මේ ගෙදර පදිංචියට ඇවිත් කීප දවසකින් ඇන්ටනිගේ පවුලට ප්‍රශ්න, අත්භූත සිදුවීම් ඇති වෙන්න ගත්තා. මේවා තව තවත් වැඩි වෙන්න ගත්තා. ඔවුන් මීට පිළිසරණක් පතමින් අන්නම්මා නම් භූතවේදියෙක් හමුවීමට උත්සාහ කරනවා.

සයිකිරන් ඩයිඩා අධ්‍යක්ෂණය කළ මෙහි ස්‍රීකාන්ත්, ඊෂ්වරී රාඕ, කුෂී රවී, ස්‍රීනිවාස් අවසරලා, රවී වර්මා යන අය මේ චිත්‍රපටයේ රඟපානවා. ස්‍රීකාන්ත් නැත්නම් ස්‍රීරාම්(තෙළිඟු සිනමාවේදී) දැන් ප්‍රශාන්ත්, ප්‍රභූ දේවා වගේම කෙමෙන් දෙමළ සිනමාවෙන් මැකී යන ඉහළ ජනප්‍රියත්වයක් තිබූ නළුවෙක්. ඔහු කේ. බාලචන්දර්ගේ Jannal – Marabu Kavithaigal (1999) ටෙලි නාට්‍යයෙන් රංගනයට අවතීර්ණ වුණා. ඒ වගේම ප්‍රේමණීය චිත්‍රපටයක් වූ Roja Kootam (2002) චිත්‍රපටයෙන් සිනමාවට පිවිසුණු ඔහුව April Maadhathil (2002), Parthiban Kanavu (2003) and Okariki Okaru (2003) චිත්‍රපටවලින් සිනමා තරුවක් දක්වා ඉහලට ගෙන ගියා. Drohi (2010) චිත්‍රපටයෙන් දිගින් දිගට ඔහු මාස්, ක්‍රියාදාම චිත්‍රපට තෝරාගැනීම නිසා ජනප්‍රියත්වය කඩාවැටෙන්න ගත්තා. ස්‍රීකාන්ත් මීට පෙර Om Shanthi Om (2015) සහ Sowkarpettai (2016) හොරර් ප්‍රවර්ගයේ චිත්‍රපට දෙකක රඟපෑවා.

Dia (2020) චිත්‍රපටිය බලපු අය කුෂී රවීව හොඳින් දන්නවා. ඇයට දියා චිත්‍රපටයේ රංගනය වෙනුවෙන් සිමා වගේම ෆිල්ම්ෆෙයා සම්මාන උළෙලවල හොඳම නිළියට හිමි සම්මාණය හිමි වුණා. නිකුත් වීමෙන් අනතුරුව මේ චිත්‍රපටයට මිශ්‍ර ප්‍රතිචාර ලැබී තිබෙනවා. Imdb හි දැනට තිබෙන රේටින් අගය 6.9/10ක්.

මේ කාලේ හදන හොරර් චිත්‍රපටි ගැන කියන්න දෙයක් නැහැනේ. The Scariest Film Ever – භයානකම චිත්‍රපටය විදියට චිත්‍රපටයේ ප්‍රචාරණ කටයුතු වලට උප ශීර්ෂයක් යොදාගෙන තියෙනවා. ඒත් ඉන්දීය හොරර් චිත්‍රපටවලදී බහුලව දකින්න නොලැබෙන අත්දැකීමක් විඳගන්න පුළුවන්. ඒ නිසා මේ වගේ චිත්‍රපටි වලට කැමති අය විතරක් අරගෙන බලන්න..