Asvins (2023) අශ්විනා… රාක්ෂ ලෝකයට යන්න

බ්‍රිතාන්‍යයේ පිහිටි නිවෙසක පැරනෝමල්(සම්මත විද්‍යාවෙන් පරිබාහිර) සිද්ධීන් නිරීක්ෂණය කර පටිගත කරන්නට යන කණ්ඩායමක සාමාජිකයින් වසර සිය ගණනක් පැරණි ශාපයකට ලක් වන්න සිදු වෙනවා. ඔවුන්ට මේ ශාපයෙන් ගැලවෙන්න හැකි වේවිද?

අස්වින්ස් 2023 වසරේ ජුනි මස 23 දා තිරගත වුණ සයිකොලොජිකල් හොරර් චිත්‍රපටයක්. විශේෂයෙන්ම කියන්න ඕන, මේක සාම්ප්‍රදායික දකුණු ඉන්දියානු හොරර් චිත්‍රපටයක් නෙවෙයි. තරුන් තේජා මල්ලාරෙඩ්ඩි විසින් මෙය රචනා කර අධ්‍යක්ෂණය කර තිබෙනවා. තරුන් තේජාගේ Asvins ලෙස මේ නමින්ම කළ කෙටි චිත්‍රපටයක් මෙලෙස වෘත්තාන්ත චිත්‍රපටයක් ලෙස නිෂ්පාදනය කර තිබෙනවා. මෙහි වසන්ත් රවී, විමලා රමන්, ස්වරස්වතී මෙනන්, උධයා දීප්, මුරලිදරන් යන අය රඟපානවා.

කවුද මේ අස්වින්ස් නොහොත් අශ්වින්වරු? මේ ගැන ටිකක් කෙටියෙන් දැනගෙන ඉමු. නක්ෂත්‍ර 17හි මුල්ම නක්ෂත්‍රය වන්නේ මේ අස්විනි කුමාරවරුන්. මොවුන් නාසත්‍ය සහ දස්රා නම් නිවුන් කුමාරවරුන් දෙදෙනෙක් වන අතර මොවුන්ට අශ්ව මුහුණු තිබෙනවා. සූර්යයාට දාව සංජනා හට උපන් මොවුන් ඖෂධවේදීන් ද වනවා. ඒ වගේම මේ නිවුන් දෙවිවරු ආර්යූවේදය ද හදාරා තිබෙනවා. යහපත් හිතක් ඇති ඔවුන්ට මිනිසුන් මිය යාමට නොදී රැක ගැනීමේ හැකියාවද සතුයි. ඔවුන් මිනිසුන්ට මෙන්ම දෙවිවරුන්ටද වෙද හෙදකම් කර තිබෙනවා. මේ චිත්‍රපටයේ කතාවේ විදියට අශ්විනි කුමාරවරුන් මිය ගිය නිවුන් දරුවන්ගෙන් කෙනෙකුට නැවත ප්‍රාණය ලබා දී, ඔවුන් සතුව තිබූ බලගතු අශ්ව හිසක් සහ මිනිස් ස්කන්ධයක් සහිත පිළිම දෙකක් දිව්‍යලෝකයෙන් ගෙන්වා බේරාගත් දරුවා හට ලබා දෙනවා.

වසන්ත් රවී ප්‍රධාන චරිත රඟන Weapon සහ Indra නම් චිත්‍රපට දෙකක් ඉදිරියේදී පැමිණීමට නියමිතයි. Pon Ondru Kanden නම් චිත්‍රපටියක් මේ අප්‍රේල් මස 14 දා OTT ඔස්සේ විකාශනය වීමට නියමිතයි. එහි වසන්ත් සමඟින් අශෝක් සෙල්වන්, ඓශ්වර්යා ලක්ෂ්මි රඟනවා. ඒත් නිෂ්පාදන ආයතනය එම චිත්‍රපටය සෘජුවම Jio ඔස්සෙ විකාශන කිරීමට තීරණය කළ බව චිත්‍රපටයේ රඟපෑ නළු නිළියන් හෝ ඊට සම්බන්ධ වෙනත් පාර්ශවයක් ඒ වන තුරු දැනුවත් කර නොතිබුණු බව සඳහන් කර තිබුණා.