Kathal: A Jackfruit Mystery (2023) කොස් කොල්ලය

Kathal – A Jackfruit Mystery ,  අශෝක් මිශ්‍රා විසින් රචනා කරන ලද සහ Netflix සඳහා යශෝවර්ධන මිශ්‍රා විසින් අධ්‍යක්ෂණය කරන ලද 2023 ඉන්දියානු හින්දි භාෂා උපහාසාත්මක ප්‍රහසන නාට්‍ය චිත්‍රපටයකි. මෙම චිත්‍රපටය නිෂ්පාදනය කරනු ලබන්නේ Balaji Motion Pictures සහ Sikhya Entertainment යන බැනර් යටතේ Shobha Kapoor, Ekta Kapoor, Guneet Monga සහ Achin Jain විසිනි. මෙම චිත්‍රපටයේ Sanya Malhotra, Anant V Joshi, Vijay Raaz, Rajpal Yadav, Brijendra Kala, Neha Saraf සහ Raghubir Yadav ප්‍රධාන චරිත නිරූපණය කරති. මෙම චිත්‍රපටය 2023 මැයි 19 වන දින Netflix හරහා නිකුත් විය.

හොඳම පන්නයේ කොස් වර්ගයකින් (මලයාසියානු අංකල් හොංග් ප්‍රභේදය) හදාපු කොස් අච්චාරුවක් කෑමට පිළිගන්නලා තමන්ගේ දේශපාලන පක්ෂයේ නායකතුමාගේ හිත දිනාගත්තු, ඉන්දියානු ව්‍යවස්ථාදායක සභාවේ සාමාජික චරිතයක් වෙන මුන්නාලාල් පටේරියා මහත්මයාට, පක්ෂ නායකතුමාගෙන් සුහද අභියෝගයක් එල්ලවෙනවා ඒ අච්චාරුවෙන්ම තව බෝතල් දෙකක් දාන්න. වෙන මොනවත් නෙමෙයි, අච්චාරු බෝතල් දෙක නැත්තන් පටේරියාට ඇමති පට්ටමත් නෑ. ඉතිං පටේරියා මහත්තයා අහල බලනව ගෙදර තව බඩු තියෙනවද කියල. හරි වැඩේ, අච්චාරු ඉවරයි. ඉතින් ආයෙ අලුතෙන්ම දාන්න වෙනවා. ආ, අවුලක් නෑ. හොඳ සාරෙට හැදිච්ච කිලෝ පහළවේ පහළවේ විතර ගෙඩි දෙකක් අන්න මිදුලෙ ගහේම තියෙනවා. කොහොමහරි පහුවදාම කොස්ගෙඩි දෙක කඩලා වැඩේට බහින්න හිතාගෙන, අන්තිමේ පහුවදා, ඒ කිව්වෙ මාර්තු 18වෙනිදා, උදෙන්ම නැගිටලා පොඩ්ඩක් ඇවිදින්න හිතාගෙන පටේරියා තුමා ඔන්න බැස්සා එළියට. එළියෙ දැකපු දෙයින්… නැත්තන්, නොදැකපු දෙයින් මහත්තයා තුෂ්ණිම්භූත වෙනවා. කොස් ගෙඩි දෙකම මිසිං. අන්තිමේදි හොයල හොයල බැරිම තැන පොලීසිය, අධිකරණ වෛද්‍ය අංශය ඇතුළු ගොඩ දෙනෙක්ගේ සහය ඇතුව නැතිවුණු කොස් හොයන්න ඒ මහත්තයා පියවර ගන්නවා, ඇත්තටම කොස්වලට වඩා දරුණු කාරණා බොහොමයකට තමන්ගේ අවධානය යොමුකරන්න මුලින් කියපු පාර්ශව වලට සිද්ධවෙලා තියෙන පසුබිමකත්. ඉතින් කොහොමහරි මේකට සම්බන්ධ තොරතුරු, සාක්කි, හෝඩුවාවල් හොය හොය යන ගමනේ දී අපේ හුදු නැතිවුණු කොස් පිළිබඳ පරීක්ෂණය අපූරු හැරවුම් ලක්ෂ්‍යයකට ළඟාවෙනවා.