Fantastic Beasts and Where to Find Them (2016) නැවතත් මායා ලෝකයේ සැරිසරමු…

කවුද හැරී පෝටර්ව නොදන්නෙ. නොදන්න කෙනෙක් ඉන්න විදිහක් නෑ. ඒ තරමටම හැරී පෝටර් චරිතය සිනමාපට ලෝලීන් වෙන අපේ ජීවිතත් එක්ක බැඳිලා. හැරී පෝටර් කියන්නෙ පොත් මාලාවක් වුණත් මං දන්නවා හුඟක් අය එයාව අඳුනගත්තෙ සිනමාපට මාලාව හරහායි. මාත් පොත කියවලා නෑ, සිනමාපට මාලාව තමා බලලා තියෙන්නෙ. මතකනෙ ඒ දවස් වල අපි කොච්චර ඒ චරිත වලට ආදරේ කලාද කියලා. හැරී, හමයිනි (ඕනම කොල්ලෙක්ගෙ මුල්ම ලව් එක ), රොන් එකතු වෙලා මායා පාසලේ මැජික් ඉගෙනගත්ත හැටි, හැංගිලා තිබ්බ රහස් හොයාගෙන යන හැටි, වොල්ඩර්මෝට් එක්ක සටන් කරපු විදිහ ඇස් ඇරගෙන නොකා නොබී බලාගෙන හිටපු හැටි මතක ඇතිනෙ? හැරීගෙ වගේ මායා යෂ්ඨියක් කියලා කෝටු කෑල්ලක් අරගෙන වින්ගාඩියම් ලෙවියෝසා කියලා ගෙදර තිබ්බ බඩු මුට්ටු එහෙම පාකරන්න බැලුවා මතක ඇතිනෙ (අදටත් ඉඳලා හිටලා ඔය වගේ වැඩ නොකරනවා නෙවෙයි ඉතින්. :3 ). කොච්චර නම් හීන දකින්න ඇතිද හොග්වර්ට්ස් වලට යන්න. අනේ ඇත්තටම මෙහෙම ලෝකයක් අපිට පේන්නෙ නැතුව තියෙනවා වත්ද දන්නෙ නෑ කියල හිතිච්ච වාර ගණන අනන්තයි. ඒ තරමටම අපි ඒ කතාවෙ තියෙන දේවල් වලට, චරිත වලට ආදරේ කරන්න ගත්තා. ඉතින් ඔන්න 2011දි Deathly Hallows Part 2 එක බැලුවට පස්සෙ අවුරුදු 5කින් අපිට ආයෙමත් හැරී හිටපු මායා ලෝකයේ සැරිසරන්න අවස්ථාව හම්බෙලා තියෙනවා. ඒ Fantastic Beasts and Where to Find them සිනමාපටයත් එක්ක. හැබැයි මේ සිදුවීම වෙන්නෙ හැරීගෙ කාලෙට කලින් කාලෙ. හරියටම කියනවා නම් 1926 වර්ශයේ. හැරී පෝටර් සිනමාපට මාලාව වගේම මේ සිනමාපටයටත් පාදක වෙන්නෙ J.K.Rowling නම් කතුවරිය විසින් ලියන ලද Fantastic Beasts and Where to Find Them නම් පොතයි. හැබැයි මෙන්න මේ “පාදක කරගෙන” කියන කතාව කියපු ගමන් කට්ටියට හිතෙන දේ නෙවෙයි ඇත්තටම මෙතනදි වෙන්නෙ. මං දන්නවා දැන් කට්ටියට හිතෙන්නෙ මේ ෆිල්ම් එකත් හදලා තියෙන්නෙත් හැරී පෝටර් ෆිල්ම් සෙට් එක වගේ පොතේ තියෙන කතාවට අනුව කියලයි. ඒත් ඇත්තටම මේ පොත එහෙම පොතක් නෙවෙයි. මේක හරියට අපි 1, 2 වසරෙ ඉගෙන ගන්නකොට අපිට ස්කෝලෙන් දෙන පෙලපොතක් වගේ පොතක්. හොග්වර්ඩ්ස් වල මුල් අධ්‍යයන වර්ශයේදි පාවිච්චි කරන පෙල පොතක් විදිහට මේක නිර්දේෂ කරලා තියෙනවා. මේ පොතේ තියෙන්නෙ හැරී පෝටර් විශ්වයේ ඉන්න මායා සත්තු ගැන විස්තර. මේ පොතේ හැරී පෝටර් විශ්වයේ ඉන්න මායා සත්තු 50කට වැඩි ප්‍රමානයක් ගැන විස්තර ඔයාලට කියවන්න පුලුවන්. විශේෂ කාරණයක් තමයි මේ පොත ලියලා තියෙන්නෙ J.K.Rowling වුනාට පොත පාඨකයින්ට නිකුත් කරලා තියෙන්නෙ නිව්ට් ස්කමැන්ඩර් කියන කල්පිත ලේඛකයාගේ නමින් කියන එක. මේ ලේඛකයා තමයි මේ සිනමාපටයේ ප්‍රධාන චරිතය වෙන්නෙත්. තවත් විශේෂ කාරණයක් තමයි මේ පොත පාඨකයන් අතට ලබෙන්නෙ හැරී පාවිච්චි කරපු පොතේ පිටපතක් විදිහට. ඒ නිසා මේ පොතේ සමහර තැන් වල හමයනි, රොන් එහෙම ලියපු එක එක විහිලු දේවල් එහෙමත් දකින්න පුලුවන්. අන්තර්ජාලයෙන් ඩවුන් කරගෙන කියෙව්වට පාඩුවක් නෑ. ඩම්බල්ඩෝගෙ පෙරවදනකුත් තියෙනවා ඒ පොතේ. ඒකෙ කියන විදිහට හැබැයි මේ පොත සල්ලි නොදී හොරෙන් ඩවුන්ලොඩ් කරගෙන එහෙම බැලුවොත් ඔන්න ඒ වගේ අයට වදින්න ඒ පොතේ “හොරාගෙ සාපය” කියලා සාපයක් කරලා තියෙනවලු. ඒ නිසා ඔන්න සල්ලි නොදී කියවනවා නම් බලාගෙනයි. ඉතින් ඔන්න ඔය පොත ලියන්න, මායා සත්තු ගැන අධ්‍යයනය කර කර යන අතරතුරේ වෙච්චි අකරතැබ්බයක් තමා මේ සිනමාපටයෙදි පෙන්නන්නෙ. මේ සිනමාපටය IMDb අගය 7.7ක් අරගෙන තියෙනවා. 2016 වසරෙ ආව සාර්ථක සිනමාපටයක් කියලා කියන්න පුළුවන්. රෝලිනුත් මේ සිනමාපටයෙ තිර රචකයා විදිහට සම්බන්ධ වෙන නිසා සිනමාපටය සාර්ථකව හැදෙන්න හේතුවක් කියලා කියන්න පුළුවන්.

ප්‍රධාන චරිතය වෙන මං කලින් කිවුව නිව්ට් ස්කමැන්ඩර් විදිහට සිනමාපටයෙදි අපට හම්බවෙන්නෙ The Theory of Everything, Jupiter Ascending, වැනි සිනමාපට හරහා අපි දැක්ක එඩී රෙඩ්මේන්. ටීනා ගෝල්ඩ්ස්ටයින් විදිහට කැතරින් වෝටර්ස්ටන් ද, ජේකොබ් කොවල්ස්කි විදිහට ඩෑන් ෆොග්ලර් ද, කුයීනි ගෝල්ඩ්ස්ටයින් විදිහට ඇලිසන් සුඩොල් ද, පර්සිවල් ග්‍රේව්ස් විදිහට කොලින් ෆැරල් ද, ක්‍රීඩන්ස් බෙයර්බෝන්ස් විදිහට එස්රා මිලර් ද, ගෙලට් ග්‍රින්ඩ්ල්වෝල්ඩ් විදිහට සුපිරි නළු ජොනී ඩෙප්ද අපිට මේ සිනමාපටය තුල දැකගන්න පුළුවන්. සිනමාපටය අධ්‍යක්ෂණය වෙන්නෙ අවසාන හැරී පෝටර් සිනමාපට හතර සහ 2016 වසරේම ආව The Legend of Tarzan සිනමාපට අධ්‍යක්ෂණය කළ ඩේවිඩ් යේට්ස් නම් අධ්‍යක්‍ෂකවරයා විසිනුයි.

කතාව ගැන නම් කියන්න ඕන නැති වෙයි. මොකද මං කිවුවා ඉස්සෙල්ලා මේක නිව්ට්ට අත් විඳින්න වෙච්ච අකරතැබ්බයක් කියලා. කතාව ඔයාලටම බලන්න ඉඩදීලා ඊට වඩා වැදගත් වෙන කරුණු ටිකක් මං කියන්නම්.

ප්‍රධාන කාරණය තමා කවුද මේ නිව්ට්? අපි දැන් හැමෝම දන්නවනෙ නිව්ට් තමා කලින් කියපු පොතේ කල්පිත රචකයා කියලා. මතක ඇතිනෙ හැරී පෝටර් සීරියස් එකේ තිබුණ නිවාස හතර. ග්‍රිෆින්ඩෝර්, හෆ්ල්පෆ්, රේවන්ක්ලෝව්, ස්ලිදරින් තමා ඒ නිවාස හතර. ඒ නිවාස හතරෙන් හෆ්ල්පෆ් නිවාසෙට තමා නිව්ට්ව අයිති වෙන්නෙ. ඔයාලා හොඳට බැලුවොතින් ඔයාලට බලාගන්න පුලුවන් අර වරායෙදි එයාගෙ සූට්කේස් එක අරිද්දි ඒක ඇතුලෙ හෆ්ල්පෆ් නිවාසෙට අයිති ස්කාෆ් එකක් පවා තියෙනවා. අන්තිමට ෆිල්ම් එක ඉවර වෙද්දි නැව ළඟ නිව්ට් ඒක කර වටේ දාගෙන ඉන්නවත් දකින්න පුලුවන්. ඔයාලට සිනමාපටය බලන අතරතුරේ අහන්න ලැබෙයි නිව්ට්ව හොග්වර්ට්ස් වලින් එළියට දැම්මා කියන එක. ඊට පස්සෙ මෙයා මායා අමාත්‍යාංශයේ මායා සතුන් නියාමන සහ පාලන දෙපාර්තමේන්තුවට සම්බන්ද වෙනවා. මෙයාගෙ මුනුපුරෙක් තමා අපි අර හැරී පෝටර් අන්තිම සිනමාපට තුනේදි දැක්ක Luna Lovegoodව බඳින්නෙ. තව විශේෂ කාරණයක් තමයි හැරී පෝටර් තුන් වෙනි සිනමාපටයෙ මරෝඩර්ගෙ සිතියමේ මේ නිව්ට්වත් පෙන්නන එක. ඔයාලා හොඳට බැලුවොතින් හැරීට මුලින්ම මේ සිතියම වීස්ලි සහොදරයො අතින් හම්බෙන වෙලාවෙදි බලාගන්න පුලුවන්. සිනමාපට වලට අමතරව පොත් සැලකුවොතින් හැරී පෝටර් මුල් පොතේ නිව්ට්ගෙ නම සඳහන් වෙනවා කියලා තියෙනවා. ඒ පොත මං කියවලා නැති නිසා හරියටම කියන්න දන්නෙ නෑ. එහෙනම් නිව්ට් ගැන බැලුවා ඇති. අපි අනිත් ප්‍රධානම චරිතෙ වෙන ගෙලට් ග්‍රින්ඩ්ල්වෝල්ඩ් ගැන බලමු.

ග්‍රින්ඩ්ල්වෝල්ඩ් කියන්නෙ ලොකයේ ඉන්න බලවත්ම අඳුරු මායාකාරයින් අතරින් එක්කෙනෙක්. මං දන්න විදිහට මෙයා දෙවනි වෙන්නෙ වොල්ඩර්මෝට්ට විතරයි. මෙයා ඉගෙනගන්නෙ ඩූර්ම්ස්ට්‍රෑන්ග් කියන හොග්වර්ට්ස් වගේම මායා පාසලක. මේ පාසලේම ඉගෙනගත්ත තවත් ශිෂ්‍යයෝ දෙන්නෙක් තමා අපිට හැරී පෝටර් හතර වෙනි සිනමාපටයෙ හම්බෙච්ච ඊගෝ කාකරොෆ්ගෙ පුද්ගලික සහයකයයි වික්ටර් ක්‍රමුයි. ඒ වුණාට මෙයා ඒ පාසලෙදි අඳුරු මායාවන් කරන්න ගිහින් පාසලෙන් එලියට දානවා. ඒ පාසල් කාලයෙදි මෙයා ඩර්ත්ලි හැලොව්ස් ගැන ලොකු උනන්දුවක් පෙන්නනවා. ඒවා හොයාගන්න ආසාවක් ඇති වෙනවා. පස්සෙ පාසලෙන් එලියට දැම්මහම මෙයා ඩර්ත්ලි හැලෝව්ස් ගැන විස්තර හොයද්දි එයින් එකක් වෙන අදෘශ්‍යමාන කබාය අයිති වුන කෙනාගෙ සොහොන ගොඩ්‍රික් හොලෝව්ස් වල තියෙනවා කියලා මෙයාට දැනගන්න හම්බෙනවා. ඔව් ගොඩ්‍රික් හොලෝව් කියන්නෙ හැරීගෙ ගම කියන එක මතක ඇතිනෙ. ඉතින් ඊට පස්සෙ මෙයා ගොඩ්‍රික් හොලෝව්ස් වල ඉන්න එයාගෙ ලොකු නැන්දා වෙන බැතිල්ඩා බැග්ශොට් ළඟට යනවා. ඊට පස්සෙ මෙහෙදි තමා මෙයාට ඩම්බල්ඩෝව හම්බෙන්නෙ. දෙන්නම දක්ෂ මායාකාරයෝ නිසා හොඳම යාලුවො වෙනවා. හැබැයි රොලින්ග් වතාවක් කියලා තියෙනවා ඇල්බස් ළඟ ග්‍රින්ඩ්ල්වෝල්ඩ් ගැන නිකන් ආදරයක් වගෙත් ඇති වෙලා තියෙනවා කියලා. කොහොම නමුත් දෙන්නම එකතු වෙලා මායාකාරයින් පාලනය කරන අලුත් ලෝකයක් හදන්න කියලා හිතාගෙන වැඩ කරනවා. ඒ වගේම දෙන්නා එකතු වෙලා ඩර්ත්ලි හැලොව්ස් තුන එකතු කරන්නත් සැලසුම් කරනවා. නමුත් ඇල්බස්ගෙ මල්ලි වුණ ඇබෆෝත් ඩම්බල්ඩෝර් මේ දෙන්නගෙ මේ වැඩෙට කැමති වෙන්නෙ නෑ. එයා බයවෙනවා මේ වැඩේ නිසා එයාගෙ කම්පනයට පත් වෙලා ඉන්න අසරණ නංගිව මෙයා දාලා යයි කියලා. ඒ නිසා ඇල්බසුයි, ඇබෆෝතුයි ග්‍රින්ඩ්ල්වෝල්ඩුයි අතර ඇති වෙච්ච සටනක් නිසා අනපෙක්ශිත විදිහට ඒ තුන්දෙනාගෙන් කෙනෙක් අතින් එයාලගෙ නංගි, ඇරියානව මැරෙනවා. ඒ සිදුවීමට පස්සෙ ග්‍රින්ඩ්ල්වෝල්ඩ් ගොඩ්‍රික් හොලෝව් වලින් පැනලා යනවා. ඊට පස්සෙ මෙයා මයිකි ග්‍රෙගෝරෝවිච් කියන මායා යෂ්ඨි නිර්මාණකාරයගෙන් එල්ඩර් වොන්ඩ් එක එහෙමත් නැත්නම් වැඩිමහල් යෂ්ඨිය හොරකම් කරනවා. ඊට පස්සෙ මෙයා මහා විනාශයන් කරන ගමන් අනුගාමිකයන් හමුදාවක් රැස් කරන්න පටන් ගන්නවා. කොහොම හරි අන්තිමට ග්‍රෙන්ඩ්ල්වෝල්ඩ්ව MACUSA එකෙන් අල්ලගත්තට ආයෙම MACUSA එකෙනුත් පැනගන්නවා. ඒ ගිහින් මෙයා, මෙයාගෙ හතුරන්ව හිරකරන්න නර්මන්ගාඩ් කියන හිරකඳවුරක් හදනවා. හුඟක් අය විශ්වාස කළේ මෙයාව නවත්තන්න පුලුවන් එකම කෙනා ඇල්බස් විතරයි කියලා. ඒ වුණත් ඩම්බල්ඩෝ ග්‍රෙන්ඩ්ල්වෝල්ඩ්ව හම්බෙන්න බය වුණා. මොකද එයාගෙ හිතේ තිබුණා නංගිගෙ මරනයට ග්‍රෙන්ඩ්ල්වෝල්ඩ්ට බැන්නට සමහර විට නංගිව මැරුනෙ තුන්දෙනා අතරෙ වෙච්ච සටනෙදි එයා අතින් වෙන්නත් බැරි නෑ කියලා. ඉතින් ඇත්තටම කාගෙ අතින්ද මැරුනෙ කියලා එයාට හොයාගන්න ඕනකමක් තිබ්බෙ නැති නිසයි එයා ග්‍රෙන්ඩ්ල්වෝල්ඩ්ව හම්බෙන්න බය වුනෙ. කොහොම නමුත් අන්තිමේදි ග්‍රෙන්ඩ්ල්වෝල්ඩ් නිසා දුක් විඳින්න වෙච්ච මිනිස්සුන්ගෙ ඉල්ලීම නිසා ඇල්බස් ග්‍රෙන්ඩ්ල්වෝල්ඩ්ව නතර කරන්න තීරණය කරනවා. ඒ සටනෙදි අන්තිමට ඇල්බස් දිනනවා. ඒ නිසා ඊට පස්සෙ එල්ඩර් වොන්ඩ් එකේ අයිතිකාරයා වෙන්නෙ ඇල්බස් ඩම්බල්ඩෝ. ඒ විදිහට තමා ඇල්බස්ට අපි අර හැරී පෝටර් කතා මාලාවෙ දකින එල්ඩර් වොන්ඩ් එක හම්බවෙන්නෙ. ඊට පස්සෙ සටනින් පරාජ වෙච්ච ග්‍රින්ඩ්ල්වෝල්ඩ්ව නර්මන්ගාඩ් කියන එයාම හදපු හිරකඳවුරේ හිර කරනවා. මේ සටන වෙලා අවුරුදු 50කට පස්සෙ වර්ෂ 1998දි මේ හිරකඳවුර ඇතුලෙදිම ග්‍රෙන්ඩ්ල්වෝල්ඩ් වොල්ඩර්මෝට් අතින් මැරුම් කනවා. අපිට ඒක ඩර්ත්ලි හැලෝව්ස් මුල් සිනමාපටයෙදි බලාගන්න පුලුවන් වුණා මතක ඇතිනෙ. ඉතින් ඕක තමා ග්‍රෙන්ඩ්ල්වෝල්ඩ් ගැන සාරාංශ වශයෙන් කියන්න තියෙන්නෙ. තව සවිස්තරාත්මකව විස්තර දැනගන්න ඕන නම් පොඩ්ඩක් අන්තර්ජාලයේ හොයලා බලන්න කියලා ඉල්ලනවා. එහෙනම් දැන් අපි යමුකො සිනමාපටයේ වැදගත්ම කොටසට.

මෙතනින් පස්සෙ කතාවෙ වෙන දේවල් තියෙන නිසා අකමැති අය කියවන්න එපා. ඒ අය ෆිල්ම් එක බලලා ඇවිත් කියවන්න.

“Will we die, just a little?”

අපි දැනටමත් දන්නවා මේ ෆිල්ම් එකෙන් පස්සෙ තව ෆිල්ම් හතරක් එනවා කියලා. ඉතින් මේ වගේ වාක්‍යයක් නිකම්ම නිකන් වාක්‍යයක් කියලා හිතන්නත් අමාරුයි. මෙයා සමහර විට කියනවා ඇත්තෙ දැන් එක මෙයාට මරන දණ්ඩනය දෙන්න යන නිසා විහිලුවට වගේ වෙන්න ඇති. මොකද කළින් වතාවෙ මෙයා නිව්ට්වයි ටීනවයි කිසිම නඩුවිභාගයක්වත් නැතුව මරණ දණ්ඩනයට නියම කරා ඒත් දැන් මෙයාව මරණ දණ්ඩනයට නියම වෙලා වගේ නිසා. එහෙම නැත්නම් අනිත් කාරණය තමා මෙයා ක්‍රීඩ්න්ස්ගෙ මරනය ගැනද මේ කියන්නෙ කියන එක. මොකද අපි හොඳාකාරවම දැක්කා ක්‍රීඩ්න්ස්ව මැරුවත් අන්තිමට පොඩි කලුපාට කොටසක් එතනින් ඇදිලා යනවා. ඒ නිසා සමහර විට ඒ ගැනද දන්නෙ නෑ කියන්නෙ. අනිත් එක තමා ඩර්ත්ලි හැලෝව්ස්. අපිට හුරු පුරුදු හැරී පෝටර් සිනමාපට වල තියෙන දේවල් කීපයක්ම මේ සිනමාපටයෙදිත් අපිට අහන්න දකින්න ලැබුනා. ඒ එකක් තමා මේ ඩර්ත්ලි හැලෝව්ස්. දකින්න ඇතිනෙ ඩර්ත්ලි හැලෝව්ස් පෙන්ඩන්ට් එක ක්‍රීඩ්න්ස්ට දෙනවා. ඒ කියන්නෙ අපිට නිගමනයක්ට එන්න පුලුවන් ග්‍රින්ඩ්ල්වෝල්ඩ් මේ ඉන්නෙ ඩර්ත්ලි හැලෝව්ස් ටික හොයන ගමන් කියලා. අන්තර්ජාලයේ නම් තිබුනෙ හොයන ගමන් කිවුවට මට නම් පොඩි කොස්සක් එනවා මෙතනදි. මං ඒක පස්සෙ විස්තර කරන්නම් අනිත් වැඩගත්ම නිගමනය තමා ග්‍රින්ඩ්ල්වෝල්ඩ් මේ කියන්නෙ හෝක්‍රක්ස් ගැන වෙන්න පුලුවන් කියන එක. කලින් හැරී පෝටර් කතා ටික බලපු අය දන්නවා ඇතිනෙ හෝක්‍රක්ස් කියන්නෙ මොනාද කියලා. මං ආයෙම විස්තර කරන්න ඕන වෙන එකක් නෑ කියලා හිතනවා. ඉතින් සමහර විට ග්‍රින්ඩ්ල්වෝල්ඩ් එහෙමත් මේ හෝක්‍රක්ස් පාවිච්චි කරනවා කියලා නිකමට හිතන්න පුලුවන්. කොහොම නමුත් තව සිනමාපට හතරක්ම එන්න තියෙන නිසා හොඳ කතාවක් බලාගන්න පුලුවන් වෙයි කියලා හිතනවා.

මෙතනදි මට කතාවෙ විශේෂයෙන්ම හිතට කාවැදිච්ච තැන් දෙකක් තියෙනවා. මුල් එක තමා නිව්ට් නිව් යොර්ක් වලට ආපු ගමන්ම දෙවනි සේලම්වරුන්ගෙ රැස්වීම ළඟදි මේරි බෙයර්බෝන් මෙයාගෙන් අහනවනෙ “Are you a seeker?” කියලා. එතනදි නිව්ට් උත්තරේ දෙන්නෙ “I’m more of a chaser, really” කියලා. කට්ටියට ක්විඩිච් මතක් වෙන්න ඇති කියලා හිතනවා ඒ දෙබස දැක්කහම. අනිත් තැන තමයි අර ග්‍රෙව්ස් නිව්ට්ටයි ටීනටයි මරන දණ්ඩනය දෙන්න යනකොට ග්‍රෙව්ස්ගෙ මූණ දිහාම බලාගෙන “මං ග්‍රින්ඩ්ල්වෝල්ඩ්ගෙ අන්ධ භක්තිකයෙක් නෙවෙයි” කියන තැන. ග්‍රින්ඩ්ල්වෝල්ඩ්ට යකා නගින්න ඇති. හෙ හේ.

කලින් කිවුවනෙ අර ඩර්ත්ලි හැලෝව්ස් හොයන කතාව. හැබැයි පේන විදිහට ග්‍රින්ඩ්ල්වෝල්ඩ් දැනටම එල්ඩර් වොන්ඩ් එක හොයාගෙනයි ඉන්නෙ. මොකද දල වශයෙන් අවුරුදු 30ක් වගේ වෙද්දි තමයි ග්‍රින්ඩ්ල්වෝල්ඩ් එල්ඩර් වොන්ඩ් එක හොරකම් කරන්නෙ. ඉතින් එතකොට මේ සිනමාපටයෙදි ග්‍රින්ඩ්ල්වෝල්ඩ්ට වයස 43ක් වෙනවා. ඒ කියන්නෙ පේන විදිහට මේ වෙනකොටත් මෙයා එල්ඩර් වොන්ඩ් එක හොයාගෙනයි ඉන්නෙ. එහෙම හිතද්දි සමහර විට ඉස්සරහ සිනමාපටයකදි ග්‍රින්ඩ්ල්වෝල්ඩ් සහ ඩම්බල්ඩෝ අතර තිබුන සටන බලාගන්නත් පුලුවන් වෙයි කියලාත් හිතෙනවා. බලාගෙන ඉමුකො ඉවසගෙන එහෙනම්..

Fantastic Beasts and Where to Find Them (2016) With Sinhala Subtitles | නැවතත් මායා ලෝකයේ සැරිසරමු…